الجري هو المجدعه

لو حكينا يا أخينا نبتدي منين الحكاية
دي حكيتنا عشان نقولها لازم نعدي علي الصرايه
صفرة كانت ولا حمره الجنان هيكون نهاية
نتنهب أو نتسرق والحرامي عليه حماية
باعولنا ميه وإحنا شغلتنا السقاية
شدوا حيلكوا كلكم قوموا معايا
قوموا معايا كلكم حتى لو كنتوا عوطليه
دا انتوا أكيد الاغلبيه
معايا عدوا في الحراميه..!
هتعدوا إيه وتعدوا ليه ...؟! دول عشروميه
وبينهبوها وبيبعوها ...ما هي تكية
في البلدية وفي الداخلية وفي المجالس الاداريه
ما النيل بتاعنا ويشربونا ميه تحليه
والحل إيه ؟؟!!!...نعمل جمعيه
وكل عاطل أخد يوماتي منه اليومية
اخدها واهرب ونصيحة مني مترفعوش بعدي قضيه
تقولي فين المجدعه ؟
في الجري ايو بتبقي هي
أخد فلوسكم أفك ضيقتي وتبقي ليا
وابقوا ادعوا ليا واستني منكم كارت التهنيه
ما الكل سارق ويعني هي جت عليا

مالك عبد السلام

ملعون ابوكي

ملعون أبوكي يا بلد
كان نفس فيكي ما أتولد
فيكي ما بنلاقي سند
وأظن ظلمك للأبد
مالندل فيكي بيتعبد
وع الكلام بنتجلد
ملعون ابوكي يا بلد
أحرار ورب البيت ما بكدبشي
وصوتنا عالي ما بتحاشْي
كذاب أنا عارف ما تقولشي
ملعون ابوكي يا بلد
لا أقسام للضرب بتستعمل
ولا مخبرين فيهم تكعبل
ولا عندنا طره وأبو زعبل
كذاب أنا عارف بستهبل
مش في بلدنا شارع الهرم
ولا عندنا نجوى كرم
والشمس طالعه والجو صافي يا محترم
كان حد قالك إن يوم فيه الأزون كان اتخرم
ولا وعد بلفور أتبرم
لو كان حصل كذاب أنا
 وما تضربني غير بالصرم

مالك عبد السلام
الثلاثاء 16/2/2007

حبسه في كيس

حبستنا لو ماكنتش في كيس
كانت بلدنا تضيع م التهيس
اصل المعلم راجل خبيس
عامل فتوه وطبعه خسيس
طول عمره بيحب التحسيس
لا بهمه معارضه ولا تأليس
خلي الأحرار بقوا محبيس
وكاسرنا ومش نافع تجبيس
و وهمنا بان بلدنا باريس
والمحروس ابنه لسه عريس
وبفكر دايما يبقي رئيس
منهم بقينا ملوك ف التفليس
رئيس وف شعبه عمال يقيس
وف جيبه جيشنا ومعاه البوليس
سبعين مليون نفر ومش لاقين ونيس
عايزين جيفاره تاني بس يكون حسيس
وياه نثور عليهم ونكسر المتاريس
ونشوف فيهم يوم ويكون بعد الخميس
هيكون أجازه طبعا نتفرج فيه ونهيص
ونقول خلصنا منهم يارب أنت المغيث
وارحمنا من شر التوريث

مالك عبد السلام

حاكم سكران

بسم الله هبدأ في أهاتي
علي اللي راح وع اللي آتي
ما الاعمي فينا صبح ساعاتي
وحتى لخرس مغنواتي
حالنا اتقلب بعد الثبات
وسايقنا أرباب العاهات
أسعار وزادت بالميات
وبيسرقوا ويقولوا الجات
جات مهما جات بردو في أجازه من الاجزات
اجزات تخودها ومش هتفرح
مهي جات بلدنا علشان تفرح
قعدت تدور ملقتش مطرح
سكران وفكر .. ومكانش ثابت كان بطوح
علي قَطر خيبه وراح مِسَطَح
كان اللي فينا عامل عزيز
راح لليهود ومضي الكويز
ليه تشتري منهم و تبيع !؟؟
حرام عليك دا اسمه تطبيع
مع اللي خلوا راسنا في الطين
كنت افتكر حتى فلسطين
اللي عليها القلب حزين
وان كنت ساكت مش ساكتين
في يوم ياخدنا ليها الحنين
ونردها لناسها المساكين
وراح نقاتل حتى بسكين

مالك عبد السلام
الأحد 14/2/2007
كوكو اللعين

الوالي الحامي والاتنين وتلاتين حرامي

حــد يـغيتنـا حـد يلقينـا....... رضينا بالهم ومرضاش بينا
قولنا قريبنا طلع ناسينا....... واحنا اللي فينا يارب كافينا
بلدنا صبحت تارسينا ....... لَمه اللصوص ويا والينا
وقولنا موسي طلع فرعون....... جايب لنا راجل مجنون
وزير ثقافه بالدبلوم....... تقفله فرشه في البلعوم
يغرق في طشط ما يوعي يعوم....... و والينا دا ورينا فيه يوم
واكل بلدنا باللي فيها ....... ورانا يا ما من غير لزوم
وحميها هو حارميها ....... اشوفه ماشي من غير هدوم
يقلعها جنبه ومايلقيها ....... مجلس وزاره دايما ظريف
سلطانا دا طول عمره خفيف....... ورئيس وزاته اسمه نظيف
طول العمود ابيض ونحيف....... واخد الهندسه قال مالجربي
ونشوف دفاعنا وانتاجنا....... الحربي ووزيرها دا تاعب قلبي
حامي الحمي راجل هاوي....... واسمه حسين ال طنطاوي
ومسلح الجيش بمطاوي....... شايل في جيبه مسدس ميه
احسنله يعمل عمليه....... بسيطه يقلب سعديه
ونروح وزاره الماليه....... ووزيرها دكتور بطرس غالي
خلي الجنيه فوق في العالي ....... لا يورو طايله ولا ياباني
منه الدولار بقي بيخاف....... والرحله لوزاره الاوقاف
لكل جامع 10 تلاف ....... ناموا المشايخ من غير لحاف
ووزيرها اصله من ربه بخاف ....... كبيرها حمدي باشا زقزوق
ومقر حكمه باب اللوق....... وللحكومه مني التحيه
ماعملو وزاره شئون قانونيه....... معاها المجالس النيابيه
ومن استشار لم عمره خاب ....... واسالوا مفيد شهاب
وهو بيسمع عمر دياب....... هل بلدنا مستكفيه ؟؟!!
هيقول خيبيتنا دي دوليه....... والشعب عايش عالتقليه
ويالله نروح الوراق....... نتمشي علي كورنيش النيل
امبابه ارض العالميه ....... هناك وزاره ري قويه
ومعاها موارد مائيه....... واعمل عبيط يا عنيه
دا وليها محمود ابو زيد ....... خلي الاراضي صبحت بيد
والفلاحين بقوا عالحديد....... وللملوك صبحو عبيد
انا نفسي احس بالامان ....... لاني ماشي في الشيخ ريحان
اتلم يا قلمي اهدي شويه....... دا انا جنب وزاره الداخليه
وخاف عليا م التعزيب....... دي ماسكها جينرالنا حبيب
طول عمره بيحب الخير ....... لاهلي واسمه حبيب باشا العادلي
اه لو تقروا اللي في قلبي....... شايل كتير ومخبي
وحياه راس والي الانتاج الحربي....... ولا بلاش راسه علشان بيزعل
دا الدكتور سيد مشعل....... ادعيله وقول ربك يقبل
ويبيع انتاجه علي طول....... وندور مين المسؤل
وفي انبي شوف واوعي تقول....... هتعدي علي وزاره البترول
مكتوب هناك لا للتدخين....... خايفين تولع في البنزين
بطل عربيتك ودا انزار ....... اسعار البنزين صبحت نار
راح يعزموك علي شوب سولار....... ولما تخرج من انبي
سلملي علي سامح فهمي....... للغاز مالقاش اس سبيل
الا بياعته الاسرائيل....... يارب امتي يبقي التعديل
دي حكومه مصر لا مش تونس....... ومعانا الدكتور احمد يونس
دايما بيمشي من غير بطاقه....... مهو والي الكاهربا والطاقه
ونروح 8 شارع عدلي ....... هناك وزاره تعاون دولي
وزريتها ولا نجوم الدوري....... دايما تلقيها وزاره عايزه
وزيريتها السيده فايزه ....... كل الكلام ده علي مسامعي
والعدل في ايد ممدوح مرعي....... دي وزاره بجد هايله
اه والمزان كفته مايله....... وللشؤون الدوليه
عاملوا وزاره الخارجيه....... وليها ولا نطاط الحيط
واسمه احمد ابو الغيط ....... وخلي المصري بقي عبيط
لو في الزباله انت محتاس....... كلم بقي ماجد غطاس
والي علي شؤون البيئه....... وبلدنا زباله ودي حقيقه
مايعيش الكلب فيها دقيقه....... اما وزاره الاعلام
وزيرها ربه بيتقي ....... دا الدكتور انس الفقي
وانا عمري ما اخاف مالتهويش....... ولا حتي من احمد درويش
دا والي تنميه اداريه....... وكان بيحب سعديه
ساكنه في القريه الذكيه....... جنب وزاره الاتصلات
بالهم يا مصري انت موعود ....... دا وزيرها طارق محمود
باعوا البلد زي الخضار....... ودا في وزاره الاستثمار
لم مسكوها في يوم لامين....... ما وزيرها صفوت محي الدين
ومن وزاره الاسكان....... الشعب كله قرفان
وللجواز مش لاقي مكان....... ولا حتي عشه مالطين
اصل وزيرها ولا بنيامين ....... واسمه احمد باشا امين
ولو مسافر مش هتلاقي الا الحنطور....... اصل القطر بقي محظور
ودا امر من يونس منصور....... وزير النقل عبد المامور
ووزاره الصحه والسكان....... بتقول تنظيم الاسره حاجه جنان
لم فيه في بلدنا عيان ....... ولا عدوي بتيجي بالدور
ولا حتي انفلوانزا طيور....... وتصريحاتها من وزيها حبيب قلبي
حاتم مصطفي الجبلي
ولان الشباب ع الوالي غالي....... عملوا وزاره تعليم العالي
فيها التعليم مجاني
ولان الوالي ابن حلال....... مسكها لهاني هلال
لا ربطنا بالاغلال....... ولا قال الدبح حلال
دا والينا في شبابنا بيدادي....... ولا عمره اتنرفز لا هادي
جابلينا عائشه عبد الهادي....... قعدها علي باب المجره
خلاها وزيره قوي عامله وهجره....... وانا في السرفيس مش لاقي اجره
وانزل هنا لتحصل ازمه....... اصل السبعه الباقين مالهم لزمه

وانا لو هكمل ما هتضربهم غير بالجزمه



مالك عبد السلام